Gruff Rhys

Yr Atal Genhedlaeth

kev — Mon, 04 Mar 2013 09:22:47 +0000

Bydd record hîr o 2005 gan Gruff Rhys, Yr Atal Genhedlaeth, a gynhyrchwyd gan Gorwel Owen yn OFN, Ynys Môn, ar gael yn ddigidol am y tro cyntaf yn ngwledydd ynysoedd Prydain fore Llûn y 4ydd o Fawrth ar safle I Tunes*

Yn cynnwys y caneuon fflachus a Sgleiniog:

•Ni Yw Y Byd!!!
•Pwdin Ŵy (rhannau un a dau)!!!
•Gwn Mi Wn!!!
•Rhagluniaeth Ysgafn!!!
•Caerffosiaeth, a llawer mwy,

Yn ogystal a campwaith Caryl,

Chwarae’n Troi’n Chwerw!!!

***** Campwaith (Y Bŷd)

***** Gwefreiddiol (papur bro cantre’r gwaelod)

** Rhagrith! (Y Wialen Ddyddiol)

* Cabledd! (Y Tyst)

* Llwyth o #%$} (Barddas)

*Wedi ei ryddhau eisioes mewn sawl gwlad yn Ewrop, Siapan a gogledd America os ydych yn trigo y tu hwnt i’r ynysoedd.

Neon Neon - albym newydd a chynhyrchiad National Theatre Wales!

kev — Thu, 24 Jan 2013 08:49:18 +0000

Bydd Neon Neon (Gruff Rhys a Boom Bip) yn rhyddhau albym newydd ‘Praxis Makes Perfect’ drwy Lex Records ar Ebrill 29ain.

Ysbrydolwyd Praxis Makes Perfect gan fywyd a gwaith Giangiacomo Feltrinelli. Ganwyd Feltrinelli i un o deuluoedd cyfoethocaf yr Eidal a daeth yn ffigwr amlwg a dylanwadol mewn gwleidyddiaeth adain chwith yn fydeang. Wrth ei ei waith fel cyhoeddwr roedd yn gyfrifol am gyhoeddi rhai o weithiau llenyddol pwysicaf yr 20ed ganrif megis The Leopard a Doctor Zhivago. Bu farw dan amgylchiadau amheus yn 1972.

Rhyddhawyd albym gyntaf Neon Neon – Stainless Style – yn 2008 wedi ei seilio ar fywyd a gwaith John DeLorean ac enwebwyd y record ar restr fer gwobrau Mercury y flwyddyn honno. Mae Praxis Makes Perfect yn cynnwys llu o westeion yn eu mysg Sabrina Salerno, Asia Argento, Cate Le Bon a Josh Klinghoffer.

Bydd Praxis Makes Perfect yn cael ei lawnsio ar y cyd gyda National Theatre Wales mewn cyfres o berfformiadau unigryw yng Nghaerdydd o’r 2ail i’r 5ed o Fai mewn lleoliad arbennig a ddatgelir yn fuan. Yn gynhyrchiad ar y cyd gyda’r dramodydd Tim Price a’r gyfarwyddwraig Wils Wilson bydd tocynnauar werth yma am £15.

neonneonofficial.tumblr.com

SEPARADO! YN EICH TELEDU!

kev — Wed, 19 Dec 2012 14:24:15 +0000

RHAID TWTIO'R TŶ CYN TUTBU...Cyngerdd fyw fyrfyfyr fendigedig yn Nghaerdydd...

kev — Tue, 20 Nov 2012 13:42:07 +0000

Bydd y band ‘surf’ o ogledd Cymru Y Niwl yn ymuno â Gruff Rhys am gig arbennig i gyd-fynd â chyfraniad Phil Collins i Artes Mundi 5 yn Chapter, Caerdydd, Rhagfyr 16. Byddant yn ail-greu’r trac sain ar gyfer y perfformiad a’r gosodwaith This Unfortunate Thing Between Us (TUTBU TV) lle y buont yn serennu fel ‘band y tŷ’.

Mae This Unfortunate Thing Between Us ar ddangos ar hyn o bryd fel Comisiwn y Bwlch Goleuo newydd ac mewn dwy garafán ar flaen-gwrt Chapter. Wedi’i berfformio’n gyntaf yn 2011 a’i ddarlledu’n fyw ar deledu digidol yn yr Almaen, sianel siopa gartre amgen ywTUTBU TV sy’n gwerthu profiadau bywyd go iawn yn lle nwyddau masgynyrchedig. Mae’n cynnwys broliant, arddangosiadau a phobl yn ffonio i mewn yn fyw i gynnig cipolwg gogleisiol ar ddyfodol posibl teledu prynwriaethol.

TOCYNNAU AR GAEL YMA

TELEDU TUTBU

kev — Thu, 04 Oct 2012 14:03:29 +0000

Carafanwyr Cymru!

Dewch yn llû!

Dewch i weld sianel ffûg fasnachol Phil Collins TUTBU TV!

Bydd yn darlledu i sgrîniau teledu o fewn 2 garafan o flaen canolfan gelf Chapter, Caerdydd o heddiw hyd mîs Ionawr.

Bydd 2 raglen awr o hyd yn darlledu, yn cynnwys cerddoriaeth hudolus ddi-dor gan Gruff Rhys ac Y Niwl.

PATRWM

kev — Fri, 27 Apr 2012 11:46:30 +0000

Cofiwch wrando ar raglen gerddoriaeth anhygoel Iwan Morgan, yma ar wefan PATRWM:

http://patrwm.com/

Paratowch i gael addysg gerddorol hamddenol, a gogoniant yn eich clustiau!

AKIRA THE DON Y RAPIWR O ERYRI

kev — Tue, 27 Mar 2012 10:06:20 +0000

Cefnogwch yr hen goes Akira The Don y rapiwr o fri o Eryri. Bum yn glust dyst unwaith i ymryson rap byr fyfyr yn y Gymraeg, rhyngtho yntau ag MC Saizmundo ar gerryg gwydn Stryd Womamby, Caerdydd. Roedd hi wedi hanner nôs, ac roedd y bleiddiaid rap yn udo o dan y Lleuad llawn!

Diolch Recordiau'r Cob

kev — Mon, 26 Mar 2012 09:15:01 +0000

Llun Gan Non Pierce

Diolch i Recordiau’r Cob Bangor am yr holl ysbrydoliaeth Cerddorol, diolch arbennig i Owen, Alan ar hôll staff am lenwi fy nghlustiau gyda daioni.

CEFNOGWCH DEULU CAERDEGOG

kev — Tue, 13 Dec 2011 11:00:09 +0000

Rali Nid yw Mon ar Werth i Wylfa B
CEFNOGWCH DEULU CAERDEGOG
Ionawr 21 ain – 2.30 yp
Maes Parcio Ffordd Glanhwfa Llangefni
Siaradwyr
Richard Jones Caerdegog
Dr Mallcom Caroll (Greenpeace)
Angharad Tomos / Menna Machreth (Cymdeithas yr Iaith)
Dr Carl Clowes / Parch Emlyn Richards (PAWB)

digwyddiad Facebook – http://www.facebook.com/#!/events/186944848062016/

Mae teulu ar Ynys Môn mewn brwydr fawr â chwmni Horizon ar hyn o bryd, sef y cwmni sydd eisiau adeiladu Wylfa B. Mae Horizon yn ceisio gorfodi teulu Caerdegog i werthu’r tir iddyn nhw gael adeiladu’r atomfa newydd. Yn ddewr iawn mae’r teulu yn gwr…thod gwneud am eu bod wedi ffermio’r tir ers cenedlaethau ac maen nhw yn erbyn yr effaith byddai Wylfa yn ei gael ar yr iaith Gymraeg ar yr Ynys.

Mae’n amser i bawb ddeffro a gweld mor erchyll fydd Wylfa B i’r iaith Gymraeg ar Ynys Môn a Gwynedd. Bydd tri chwarter o’r swyddi i bobl o’r tu allan i Ogledd Cymru. Bydd datblygiadau tai wrth y miloedd yn dilyn. Pam derbyn yn slafaidd gynlluniau San Steffan am orsaf niwclear pan fedrwn ni gael egni gwyrdd a allai wneud yr Ynys yn gyfoethog?

gwybodaeth – gogledd@cymdeithas.org 01286 662908

Er Côf Am Gary Speed.

kev — Wed, 07 Dec 2011 12:02:01 +0000

Oes unhrywun yn cofio digwyddiad mor anisgwyl? Mae o fel petae’r Pâb wedi lladd ei hun neu rywbeth cyffelyb. Dyw’r peth ddim yn gwneud unhryw synnwyr, rhywsut.

Roeddwn i wedi cynhyrfu’n lân ers rhai misoedd am gryfder newydd ein tîm peldroed. Roedd hyn hyd yn oed wedi gwella fy safon byw.

Be dw i’n ceisio esbonio ydy ‘mod i wedi bod yn cymryd mwy o sylw o Gary Speed, ers ei benodiad llynedd yn reolwr Cymru, nag erioed o’r blaen.

Roedd wedi dod ag ysbryd sionc, pell-gyrhaeddol i’r garfan ac wedi hyrwyddo technegau arbrofol a chyfoes – yn rhanol drwy benodi aelodau i’w staff oedd yn flaenllaw yn y byd peldroed ar lefel rhyngwladol. Pobl fel yr Iseldirwr, Raymond Verheijen. Roedd newyddion calonogol yr wythnos yma o’i obaith i ddyfalbarhau gyda carfan Cymru.

Ond i ‘nghenhedlaeth i, roedd Speed wastad wedi bod yno ( dw’i flwyddyn yn iau ).
Dw i’n cofio pan oedd o’n chwarae i Leeds efo’i wallt yn edrych fel petae o ar ei ffordd i rave. Rhywsut, roedd o’n cynrychioli ysbryd ieuenctid a’r holl hunan-hyder sy’n rhan o hynny.

Bu bron iddo fynd i Gwpan Y Byd yn ’94 – yn nhîm Terry Yorath. Roedd yn gapten ar dîm trydanol Mark Hughes a gurodd yr Eidal yn 2002.

Mae’r dirgelwch ynghylch ei farwolaeth yn boenus. Fel pawb, dw’i prin wedi meddwl am ddim arall. Gyda phob math o gynllwynion yn chwyrlio o gwmpas fy ‘mennydd. Pam Speed? Pam Cymru?

Os nad oedd Speed yn arbennig o isel ei ysbryd, pa fath o drybini oedd yn pwyso cyn-drymed ar ei feddwl, druan?

Am ryw reswm mae’n f’atgoffa o farwolaeth Carwyn James yn ’83 – efallai am fod y ddau yn rheolwyr blaenllaw, yn Gymry, ac yn bobl nad oeddem yn barod i ffarwelio â nhw eto.

Ta waeth, y gronyn bach sy’n galonogol am y sefyllfa druenus hon ydy’r ysbrydoliaeth y gallwn dynnu arno i’n tywys allan o’r pydew yma o dristwch.
Roedd Speed yn hollol ddi-ffuant ei grêd y gallwn, fel cenedl, gyflawni unhrywbeth y dymunwn – neu o leia roi cynnig gô dda arni.
Yn fwy na hynny, credai y gallwn wireddu hynny mewn modd urddasol a gogoneddus.

Drwy geisio ymddwyn yn ddiymhongar, blaenllaw a hyderus yn ein maesydd, efallai y medrwn oll ddathlu ei gyfraniad i’n diwylliant.